ბატონო ირაკლი,

თქვენი 2026 წლის 19 მაისის შეტყობინების პასუხად, გაცნობებთ, რომ „ფასიანი
ქაღალდების ბაზრის შესახებ“ საქართველოს კანონის მე-2 მუხლის 32-ე პუნქტის
თანახმად, ფასიანი ქაღალდი (ფასიანი ქაღალდები) არის მიმოქცევადი ფინანსური
ინსტრუმენტები და უფლებები, რომელთა საჯარო შეთავაზებაც შესაძლებელია
წილობრივი თუ სასესხო ფასიანი ქაღალდების სახით (ან მათი კომბინირებული
ვარიანტით) ან რომლებიც შეიძლება გარდაიქმნას ასეთებად ან რომლებიც არიან
ასეთებზე ხელმოწერისა თუ ასეთების შეძენის უფლების მატარებლები, საინვესტიციო
ხელშეკრულებები და ფასიან ქაღალდებთან დაკავშირებული სხვა ინსტრუმენტები და
უფლებები. ამავე კანონის 10^1 მუხლის პირველი პუნქტით ფასიანი ქაღალდების
ფორმებია განსაზღვრული. კერძოდ, კანონმდებლობით დადგენილი შეზღუდვების
გათვალისწინებით, ერთი და იმავე კლასის ფასიანი ქაღალდები შესაძლებელია
საქართველოში გამოშვებულ იქნეს ერთ-ერთი შემდეგი ფორმით: ა) რეგისტრირებული
ფორმით, ფასიანი ქაღალდების რეესტრის მეშვეობით; ბ) დემატერიალიზებული
ფორმით, ცენტრალური დეპოზიტარის სისტემაში; გ) კანონით განსაზღვრული სხვა
ფორმით.

დამატებით, „მეწარმეთა შესახებ“ საქართველოს კანონის 151-ე მუხლის პირველი
პუნქტის მიხედვით, აქცია არის რეგისტრირებული ფასიანი ქაღალდი ან
დემატერიალიზებული ფასიანი ქაღალდი, რომელიც განსაზღვრავს სააქციო
საზოგადოების კაპიტალში პირის მონაწილეობას. აღნიშნულის გათვალისწინებით,
მოქმედი კანონმდებლობა არ ითვალისწინებს აქციების გამოშვებას სერტიფიკატის
სახით.

ყოველივე ზემოაღნიშნულიდან გამომდინარე, ეროვნული ბანკი მოკლებულია
შესაძლებლობას მოგაწოდოთ სხვა დამატებითი ინფორმაცია/განმარტებები.

პატივისცემით,

საქართველოს ეროვნული ბანკი