ქალბატონო ელისაბედ,

საქართველოს ენერგეტიკისა და წყალმომარაგების მარეგულირებელი ეროვნული კომისიის (შემდგომში – კომისია) ელექტრონულ მისამართზე 2022 წლის 6 თებერვალს შემოსულ თქვენს განცხადებასთან დაკავშირებით გაცნობებთ, რომ ხსენებული განცხადება არ აკმაყოფილებს საქართველოს ზოგადი ადმინისტრაციული კოდექსით განსაზღვრულ მოთხოვნებს შემდეგი გარემოებების გამო:
საქართველოს ზოგადი ადმინისტრაციული კოდექსის 77-ე მუხლის პირველი ნაწილის თანახმად, თუ კანონმდებლობით სხვა რამ არ არის დადგენილი, განცხადება შეტანილი უნდა იქნეს იმ ადმინისტრაციულ ორგანოში, რომელიც უფლებამოსილია გადაწყვიტოს განცხადებაში დასმული საკითხი და გამოსცეს შესაბამისი ინდივიდუალური ადმინისტრაციულ-სამართლებრივი აქტი, მე-2 ნაწილის თანახმად, განცხადებისა და მასზე დართული დოკუმენტების თუ სხვა სახის ინფორმაციის წარდგენის წესი, თუკი იგი დადგენილი არ არის კანონით ან მის საფუძველზე გამოცემული კანონქვემდებარე აქტით, განისაზღვრება შესაბამისი ადმინისტრაციული ორგანოს დებულებით, ხოლო საქართველოს ზოგადი ადმინისტრაციული კოდექსის 78-ე მუხლის პირველი ნაწილის „დ“ ქვეპუნქტის თანახმად, ადმინისტრაციულ ორგანოში წერილობითი ფორმით წარდგენილი განცხადება სავალდებულოდ უნდა შეიცავდეს განმცხადებლის ხელმოწერას.
კომისიის 2021 წლის 13 მაისის N9 დადგენილებით დამტკიცებული „საქართველოს ენერგეტიკისა და წყალმომარაგების მარეგულირებელი ეროვნული კომისიის მიერ ადმინისტრაციული წარმოების განხორციელების დებულების“ მე-13 მუხლის პირველი პუნქტის თანახმად, განცხადება კომისიას შესაძლებელია წარედგინოს როგორც მატერიალური, ისე – ელექტრონული ფორმით. კომისიაში ელექტრონული ფორმით წარდგენილი განცხადება ხელმოწერილი (დადასტურებული) უნდა იყოს „ელექტრონული დოკუმენტისა და ელექტრონული სანდო მომსახურების შესახებ“ საქართველოს კანონით დადგენილი წესის შესაბამისად, ხოლო მე-2 პუნქტის თანახმად, განცხადება უნდა შეიცავდეს საქართველოს ზოგადი ადმინისტრაციული კოდექსის 78-ე მუხლის პირველი ნაწილით გათვალისწინებულ ინფორმაციასა და მონაცემებს.
საქართველოს ზოგადი ადმინისტრაციული კოდექსის 83-ე მუხლის მე-2 ნაწილის თანახმად, „თუ განმცხადებელი ადმინისტრაციულ ორგანოს არ წარუდგენს კანონით ან მის საფუძველზე გამოცემული კანონქვემდებარე აქტით გათვალისწინებულ რაიმე დოკუმენტს ან სხვა ინფორმაციას, რაც აუცილებელია საქმის გადაწყვეტისათვის, ადმინისტრაციული ორგანო განმცხადებელს განუსაზღვრავს ვადას, რომლის განმავლობაშიც მან უნდა წარადგინოს დამატებითი დოკუმენტი ან ინფორმაცია“, ხოლო მე-5 ნაწილის თანახმად, „თუ დადგენილ ვადაში განმცხადებელი არ წარადგენს შესაბამის დოკუმენტს ან ინფორმაციას, ადმინისტრაციული ორგანო უფლებამოსილია გამოიტანოს გადაწყვეტილება განცხადების განუხილველად დატოვების შესახებ“. იმავე მოთხოვნებს შეიცავს კომისიის 2021 წლის 13 მაისის N9 დადგენილებით დამტკიცებული „საქართველოს ენერგეტიკისა და წყალმომარაგების მარეგულირებელი ეროვნული კომისიის მიერ ადმინისტრაციული წარმოების განხორციელების დებულების“ მე-14 მუხლი.
აღნიშნულიდან გამომდინარე, რამდენადაც თქვენი ელექტრონული წერილი არ პასუხობს მითითებული ნორმატიული დანაწესების მოთხოვნებს, გთხოვთ ხელმოწერილი განცხადება კომისიაში წარმოადგინოთ 5 დღის ვადაში, წინააღმდეგ შემთხვევაში თქვენი განცხადება დარჩება განუხილველი.

პატივისცემით,

ელეონორა ლაგვილავა,

კომისიაში საჯარო ინფორმაციის ხელმისაწვდომობის უზრუნველყოფაზე პასუხისმგებელი პირი

ციტატირებული სექციების ჩვენება