მოგესალმებით
სახელმწიფო სერვისების განვითარების სააგენტოს, საჯარო ინფორმაციის გაცემაზე პასუხისმგებელ პირს.
როგორც თქვენთვის ცნობილია, თვითმართველი ორგანოები - აწესებენ წყალმომარაგებისა და დასუფთავების გადასახადს, რომელიც გამოიანგარიშება სულადობრივი ოდენობის შესაბამისად. სიმართლე გითხრათ დაზუსტებით არც ვიცი რამდენია გადასახდელი - თუმცა, რამდენადაც მსმენია იგი გამოიანგარიშება ამა თუ იმ მისამართზე მცხოვრები პირის რაოდენობის შესაბამისად, შესაძლოა დამგვალების პრინციპითაც. თუმცა, არის შემთხვევები, როდესაც ფიზიკური პირი არ იმყოფება საქართველოში, მათ შორის 6 თვეზე მეტი პერიოდით, მაგრამ მის სახელზე ირიცხება გადასახდელი თანხა.
საქართველოს კონსტიტუციისა და საქართველოს ზოგადი ადმინისტრაციული კოდექსის შესაბამისად, გთხოვთ, მომაწოდეთ შემდეგი სახის საჯარო ინფორმაცია შემდეგზე (პუნქტების დაცვით):
1) აქვს თუ არა სასაზღვრო პოლიციას ელექტრონულ მონაცემთა ბაზა (დადებითი პასუხის შემთხვევაში, როდიდან), რომლის შესაბამისად - მას შეუძლია საქართველოს მოქალაქეთა, მოქალაქეობის არმქონე პირთა და საქართველოში ბინადრობის მფლობელ პირთა ქვეყნის საზღვრების დატოვების ფაქტების აღრიცხვა იმდაგვარად, რომხდეს მათი ფილტრაცია - მათ შორის საცხოვრებელი რაიონების შესაბამისად;
2) მოუმართავს კი 2013 წლიდან დღემდე ან თუგინდ 2013 წლამდე პერიოდში (ამდაგვარი ინფორმაცია თუ იძებნება თქვენთან) უფლებამოსილ ადმინისტრაციულ ორგანოს მსგავსი ინფორმაციის მისაღებად და როდის?
3) ფლობთ არა რაიმე ინფორმაციას ან თვითონ დოკუმენტის ასლს - სასაზღვრო კვეთის მონაცემების დამუშავების კუთხით უფლებამოსილებ ორგანოთა შორის (მათ შორის კონკრეტულად მომხმარებელთა უფლებების დაცვის მიზნით) გაცვლის/ კოორდინაციის მარეგულირებელი სამართლებრივი აქტების შესახებ (ჩემთვის უცნობია, არ მახსოვს).
ცნობისათვის: ბოლო წლებში გაჟღერებული ინფორმაციით, უცხოეთში იმყოფება მილიონ ნახევარი საქართველოს მოქალაქე. სავარაუდოდ დაახლოებით მათი ნახევარი, უცხოეთში გამგზავრებამდე იქნებოდა ქალაქად მცხოვრები, შესაბამისად რეგისტრირებული. საკითხი ეხება 750 ათას მოქალაქეს და თუგინდ 1-1 ლარი, რომ ვიანგარიშოთ თითოეული მოქალაქის გამო დაკისრებული ზემოხსენებული კომუნალური გადასახდელის სახით, გამოდის, რომ (შესაძლოა) ყოველთვიურად 1 500 000 ლარის, წელიწადში კი 18 000 000 ლარის - მათვის არამართლებულად დაკისრებაზე თუ მოსაკრებლისგან გათავისუფლებაზე შეიძლება მსჯელობა.

სასურველია მოთხოვნილი ინფორმაცია აისახოს საპასუხო კორესპონდენციის ძირითადი ტექსტის ნაწილში ან დანართის სახით გამოგზავნის შემთხვევაში მოწოდებულ იქნეს სათანადო წესით დამოწმებული დოკუმენტის სახით (მათ შორის საქართველოს ზოგადი ადმინისტრაციული კოდექსის მე-20 მუხლის და ელექტრონული დოკუმენტებისა და ელექტრონული სანდო მომსახურების შესახებ საქართველოს კანონის მე-4 მუხლის მე-3 პუნქტის გათვალისწინებით)

განცხადება წარმოდგენილია ყოველგვარი დანართის გარეშე.

აქვე, აღნიშნული ინფორმაციის მოპოვება განპირობებულია ჩემს მიერ - ჟურნალისტიკური საქმიანობის განხორციელების მიზნებით.

პატივისცემით,
ნიკოლოზ ნიკოლაძე